Im Konfjohr dörfsch Du nit an d’Fasnacht go
Ha-n-ich sinerzyt von unsrem Pfarrer vernoh
25 Johr Fasnacht in dr Kirche s’isch schön
So düen mir dr Gottesdienscht bestritte
Mit Costym und Värs und Piccolotön
Jä mir hänn do anderi Zyyte
Habemus Papam heisst’s bim Leo z’Rom
Why not me? meint dr Trump in scharfem Ton
Au s’Baselbiet duet en-art Papschtwahl pfläge
Bruucht d’Regine die erscht au im Trump si säge?
Mord im Räbbärg, Betrug und hüslichi Gwalt
Menschehandel, Raub und unterschlagig vom Ghalt
Dasch kai Krimiserie wo’s klöpft und kracht
Do wird Wärbig für e Gottesdienscht gmacht
Blyyb verspielt isch’s Motto vor dr Fasnacht jo
Au Jesus isch um d’Kinder froh
Sie sinn so lebändig, spontan und fit
Aber am Suppetag, do wott me si nit.
Binnige schickt d’Füürwärksinitiative bachab
Und me schiesst an Sylvester e huffe Böller ab.
Vom Krach fahre Katz und Hund uss dr Hutt
Aber d’Kircheglogge, die sinn z’lutt.
Um Spitalpatiänte hänn Stadt und Land jetzt krach.
Bi Kirchemitglieder kämpft me um die gliichi Sach,
Wäggslisch zur Münschtergmeind – s’isch nit egal
Griegsch e Vorzugsbehandlig im Bethesta-Spital
Dr Swen goth z’Bottmige in die säggsti Klass
Kai Reliunterricht, das findet är voll krass.
Dr Güggel am Kirchturm zeigt ihm gli
Bottmige isch französisch gsi.
Tanze, Kino, Kochschuel und Konzärt
Baschtle, Schifahre, das het sich bewährt
E Reisli und no-n-e Computerkurs
So gseht’s Programm vo unsrer Kirchgmeind us
