Am Fasnachtsgottesdienst vom Sonntag, 6.3.2022 durften wir die Schnitzelbängg unserer Kirchemuus geniessen. Auch ein erlesenes Grüppli virtuoser Piccolospieler hat unsere Ohren verwöhnt und uns auf die Fasnacht eingestimmt.
D‘ Kirchemuus 2022
S‘ git eini wo schier d’Wänd uffgoht
Wenn d’Glogge z’Bottmige s’Stündli schloht
Die hett kei Vergliich mit Binnige gmacht
Dört lütet d’Glogge z‘mitzt in dr Nacht.
—
Als Kirchemuus ha-n-ich’s so schwär
Matinee ohni Apero, dr Buuch isch lär
Dank Hymne zur Nacht isch’s besser ko
Die Glüewyytropfe mache froh.
—
Pi und beta nü und tau
S griechisch Alphabet kenn ich genau
Meh als omikron und delta ha
Gilt für uns Alpha und Omega.
—
D’Rose abgfrässe und d’Tulpe no meh
Uff em Friedhof z’Bottmige hett‘s e Reh
Es Grücht isch in dr Gmeind uffkocht
Dr neu Pfarrer hett’s vom Hörnli brocht.
—
Händel, Schumann und au Bach
schöni Kläng das isch dis Fach
Di Musig isch wie-n-e Zaubertrank
Ich sag Thomas Thüring härzlige Dank.
—
Es kunnt mir wie-n-e Alptraum vor
In Europa isch Krieg s’isch wirklich wohr!
Freiheit und Völkerrächt alls vom Tisch
Und ich merk wie koschtbar Friede isch.
—
Euri Kirchemuus